عز الكلام ، خيّم الحزن والصمت

عز الكلام !!!!!

​

عز الكلام وخيّم الحزن والصمت​

والجرح الأول رافقه جرح ثاني​

رفعت طرفي للسما فوق وأقسمت​

أني حبيس المهجريـن بزماني​

كني عن أيامي وعثراتها نمت​

وصحيت أذكر كل جرحٍ نساني​

عشت وتعايشت وهيقت وتوهمت​

وأخذت وأعطيت ومنعت وعطاني​

المستحيل اللي على مصافحه همت​

وعن كل واقع في حياتي خذاني​

لأني عزيت ولا مشيت وتقدمت​

أعـيش غـربة واقعي والأماني​

كم وجه فيه أملت خير وتوسمت​

وأصبحت ضامي والسراب يحداني​

وأغضيت وأنبت الضمير وتندمت​

ونخيت صبري طاع وإلا عصاني​

مجنون عاقل عاطفي وأن تكرمت​

لا تستبيح الجرح والشأن شاني​

يمكن طموحي غير يمكن تشيمت​

عـن كل صوتٍ مرني ما دعاني​

يمكن لفرصات الزمن ما تغانمت​

مـرت وطافتني وأنا في مكاني​

بـس الوكاد أني مثل ما تعلمت​

لي منهجي لي نظرتي لي كياني​

لا تسألين مـن أي جرح تألمت​

يا أجمل قصيدي يا دلال المعاني​

يا بنت لو عن كل ما بي تكلمت​

الحبر جف .. ولا أنتهى ترجماني​

تدرين ليه البوح والحزشن والصمت​

لـ أني فرحت وفرحتي بك ثواني​

...​